2014 წლის 24 მარტს საქართველოს შინაგან საქმეთა სამინისტროს მიერ დაანონსდა დასაწყისი ფართო ანტინარკოტიკული კამპანიისა - „არა ბიონარკოტიკს”. კამპანიაში აქტიურად არიან ჩართულნი ისეთი სახელმწიფო უწყებები, როგორიცაა საქართველოს შრომის, ჯანმრთელობისა და სოციალური დაცვის სამინისტრო, საქართველოს განათლებისა და მეცნიერების სამინისტრო, საქართველოს ფინანსთა სამინისტრო, საქართველოს სპორტისა და ახალგაზრდობის სამინისტრო.

კამპანიის მიზანია საზოგადოების, განსაკუთრებით კი ახალგაზრდების, მაქსიმალური ინფორმირებულობა ნარკოტიკების უკანონო ბრუნვის სხვადასხვა ნეგატიურ მხარეებთან დაკავშირებით. ამით შინაგან საქმეთა სამინისტრო ახორციელებს თავის პირველად ფუნქციას - პრევენციას. საქართველოს პოლიცია, მართალია, თითოეულ ჩადენილ დანაშაულზე ახდენს ეფექტურ რეაგირებას. თუმცა, გაცილებით უფრო მნიშვნელოვანია პოლიციის ინტერვენირება მანამ, სანამ დანაშაული მომხდარა. სწორედ აღნიშნულის ყველაზე საუკეთესო გზაა საზოგადოების ინფორმირებულობა, რაც შეესაბამება დასავლურ სტანდარტებსა და იმ საზოგადოებაზე ორიენტირებული პოლიციის სურათს, რომელიც უკანასკნელი ორი წლის განმავლობაში საქართველოში ჩამოყალიბდა. საქართველოს შინაგან საქმეთა სამინისტროსთვის მნიშვნელოვანია მთელი მოსახლეობის, საზოგადოების ყველა სეგმენტის ჩართულობა ნარკომანიის წინააღმდეგ ბრძოლის უმნიშვნელოვანეს საქმეში. სწორედ ამიტომ კამპანიის სლოგანია - „ერთად შევცვალოთ დამოკიდებულება”.

ანტინარკოტიკული კამპანიის ფარგლებში საქართველოს შინაგან საქმეთა მინისტრი და სამინისტროს სხვა წარმომადგენლები, ჯანდაცვის სფეროს წარმომადგენლებთან ერთად, სკოლებსა და უნივერსიტეტებში ხვდებიან ახალგაზრდებს. ისინი მათ აცნობენ როგორც ნარკოტიკების არალეგალურ ბრუნვასთან დაკავშირებულ სამართლებრივ შედეგებს, ასევე, ნარკოტიკების მოხმარების ნეგატიურ გავლენას ადამიანის სიცოცხლესა და ჯანმრთელობაზე. კამპანიას შეუერთდნენ სპორტისა და ხელოვნების სხვადასხვა წარმომადგენლები. მათ მიერ განხორციელდა სხვადასხვა მხარდამჭერი ღონისძიება.

განსაკუთრებით აღსანიშნავია ის დიდი რეზონანსი, რომელიც ანტინარკოტიკულ კამპანიას მედიასა და სოციალურ ქსელებში მოჰყვა. აღნიშნული აქტიურად შუქდებოდა საინფორმაციო გამოშვებებში, მიეძღვნა სხვადასხვა გადაცემები, მიმდინარეობს აქტიური განხილვა სოციალურ ქსელებსა და ინტერნეტ-ბლოგებზე. შინაგან საქმეთა სამინისტროს ინიციატივით, ჩატარდა მედია-კონკურსი, სადაც სხვადასხვა ნომინაციებში მედიის წარმომადგენლებმა გაიმარჯვეს. აღნიშნულ კონკურსზე წარმოდგენილი იყო ძალიან ბევრი საინტერესო ტელე თუ რადიო სიუჟეტი, გადაცემა, სტატია და სხვ.

საბოლოო ჯამში, ანტინარკოტიკული კამპანიის მთავარმა გზავნილებმა მოსახლეობის ყველა სეგმენტამდე, განსაკუთრებით, ამ კუთხით ყველაზე მოწყვლად ჯგუფამდე - ახალგაზრდობამდე მიაღწია, რამაც, ბუნებრივია, ხელი შეუწყო ნარკოტიკების მოხმარების კლებასა და ნარკომოხმარების პრევენციას ქვეყანაში.