შინაგან საქმეთა სამინისტროს საგანგებო სიტუაციების მართვის სამსახურს იაპონიის მთავრობა 2 სახანძრო მანქანას შეუძენს. საგრანტო პროექტის პრეზენტაცია და ხელმოწერის ცერემონია იაპონიის საელჩოში გაიმართა. ღონისძიებას შინაგან საქმეთა მინისტრის მოადგილე ლევან კაკავა ესწრებოდა.
იაპონიის მთავრობის "გრასრუტისა და ადამიანის უსაფრთხოების საგრანტო დახმარების (GGP)" პროგრამის ფარგლებში შეძენილი ახალი მანქანები ბორჯომის მუნიციპალიტეტისთვის არის განკუთვნილი. ახალი სახანძრო ტექნიკა ევროპაში ერთ-ერთი ყველაზე დიდი პარკის, ბორჯომ ხარგაულის დაცული ტერიტორიების დაცვას მოემსახურება. როგორც იაპონიის საელჩოში განაცხადეს, ბორჯომ-ხარაგაულის ეროვნული პარკი მისი მნიშვნელობიდან გამომდინარე საკონსერვაციო ცხელ წერტილებში მოხვდა, ახალი მოქნილი სახანძრო მანქანები კი ცეცხლის ჩაქრობას განსაკუთრებით რთულად მისადგომ ადგილებში შეძლებენ, რაც საქართველოს ეროვნული ძეგლის დაცვაში დაეხმარება.
შინაგან საქმეთა მინისტრის მოადგილემ იაპონურ მხარეს დახმარებისთვის მადლობა გადაუხადა:
,,ტყის ორი სახანძრო ავტომობილი და მეხანძრე - მაშველთა მომზადება განკუთვნილია სამცხე- ჯავახეთის რეგიონისთვის, კერძოდ ბორჯომის მუნიციპალიტეტისთვის. ეს მხარე წარმოადგენს ერთ-ერთ ყველაზე მოწყვლად რეგიონს ტყის ხანძრებთან მიმართებაში. დარწმუნებული ვარ, რომ იაპონიის მთავრობის მიერ გაწეული დახმარება ძალზე მნიშვნელოვან წვლილს შეიტანს საქართველოს საგანგებო სიტუაციების მართვის სისტემის კიდევ უფრო გაძლიერებაში."- განაცხადა შინაგან საქმეთა მინისტრის მოადგილემ ლევან კაკავამ.
