შინაგან საქმეთა სამინისტროს ცენტრალური კრიმინალური პოლიციის დეპარტამენტის დირექტორის მოადგილის - მამუკა ჭელიძის ბრიფინგი
როგორც თქვენთვის უკვე ცნობილია, შინაგან საქმეთა მინისტრი გიორგი გახარია ამ წუთებში შეხვედრას მართავს პანკისის ხეობის მოსახლეობასთან. მანამდე კი მოგაწვდით ინფორმაციას პანკისში განვითარებულ მოვლენებთან დაკავშირებით.
როგორც მოგეხსენებათ, პანკისის ხეობაში დღეს განახლდა 5-მეგავატიანი მცირე ჰესის მშენებლობა.
უსაფრთხოებისა და მართლწესრიგის დასაცავად, ეკონომიკის სამინისტროს მომართვის საფუძველზე, ადგილზე დილიდან მობილიზებულია პოლიციის შესაბამისი ძალები.
ადგილობრივი მოსახლეობის გარკვეულმა ჯგუფმა პოლიციას გაუწია წინააღმდეგობა, კერძოდ, დაუშინეს ჯოხები და ქვები. დაზიანებულია პოლიციის ტექნიკა, ჯანმრთელობის დაზიანება მიიღეს პოლიციის თანამშრომლებმა და საპროტესტო აქციის მონაწილეებმა.
მოლაპარაკებების პარალელურად, პოლიციის ძალების გადაადგილებისას, ხელკეტებითა და ქვებით შეიარაღებულმა პირებმა პოლიციას კვლავ გაუწიეს წინააღმდეგობა. პოლიცია იძულებული გახდა, სიტუაციის გამწვავების თავიდან აცილების მიზნით, კანონით დაშვებული სპეციალური საშუალებები გამოეყენებინა.
შინაგან საქმეთა სამინისტრო მოუწოდებს ყველას, დაემორჩილონ პოლიციის მოთხოვნებს, რომელიც კანონის ფარგლებში მოქმედებს. წინააღმდეგ შემთხვევაში, პოლიცია იმოქმედებს სრული სიმკაცრით. საჭიროების შემთხვევაში, გამოყენებული იქნება სპეციალური საშუალებებიც.
ამ დროისთვის, ჩვენი ინფორმაციით, სასწრაფო სამედიცინო დახმარება აღმოუჩინეს 27 ადამიანს, მათ შორის 12 ადგილობრივს და სპეცდანიშნულების 15 თანამშრომელს. შინაგან საქმეთა სამინისტროს 8 დაშავებული თანამშრომელი გადაყვანილია კლინიკაში.
შინაგან საქმეთა სამინისტრო მუშაობის აქტიურ რეჟიმზეა გადასული და საზოგადოებას პერიოდულად მიეწოდება ინფორმაცია.
