შსს სპეციალური და საგანგებო ღონისძიებების ცენტრის განსაკუთრებულ დავალებათა დეპარტამენტის წარმომადგენლები, ოპერატიული დაგეგმარებისა და მართვის სამმართველოს ოპერატიული განყოფილების უფროსი პაატა ჩოფიკაშვილი და სამეგრელო-ზემო სვანეთის სამხარეო განსაკუთრებულ დავალებათა სამმართველოს თანამშრომელი მანუჩარ ინჯგია საქართველოს პრეზიდენტმა გიორგი მარგველაშვილმა 2015 წლის 13 ივნისს ქალაქ თბილისში, მდინარე ვერეს ხეობაში მომხდარი წყალდიდობის დროს გამოჩენილი განსაკუთრებული პროფესიული პასუხისმგებლობის, გაბედული მოქმედებისა და სამაგალითო თავდადებისათვის სახელმწიფო ჯილდოთი ,,მხედრული მამაცობისათვის“ დააჯილდოვა.
სტიქიის დღეებში საზოგადოება მომსწრე გახდა ასეულობით ადამიანური, მოქალაქეობრივი და პროფესიული გმირობის ისტორიისა. მათ შორის აღსანიშნავია მანუჩარ ინჯგიასა და პაატა ჩოფიკაშვილის თავგანწირვა, რომელთაც წარმოუდგენელი რისკის ფასად ადამიანთა სიცოცხლე იხსნეს. რომ არა მათი მაღალი პროფესიონალიზმი და მოქალაქეობრივი შეგნება მსხვერპლი და სტიქიისაგან მიყენებული ზარალი გაცილებით დიდი იქნებოდა.
