შინაგან საქმეთა მინისტრის მოადგილე, ალექსანდრე დარახველიძე ევროკავშირის მიერ დაფინანსებული პროექტის - „საგზაო მოძრაობის უსაფრთხოების ერთიანი მონაცემთა ბაზის ჩამოყალიბების და საგზაო უსაფრთხოების მართვის შემდგომი გაუმჯობესების მხარდაჭერა საქართველოში“ - გახსნით ღონისძიებას დაესწრო.
შინაგან საქმეთა მინისტრის მოადგილე - ალექსანდრე დარახველიძე, ეკონომიკისა და მდგრადი განვითარების მინისტრის მოადგილე - გურამ გურამიშვილი, პოლონეთის განვითარების ფონდებისა და რეგიონული პოლიტიკის მინისტრი - გრეგორზ პუდა, ლიეტუვის რესპუბლიკის ელჩი საქართველოში - ანდრიუს კალინდრა, პოლონეთის ელჩი საქართველოში - მარიუშ მაშკიევიჩი, დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორი - ამირან გამყრელიძე, საგარეო საქმეთა სამინისტროს ევროინტეგრაციის გენერალური დირექტორატის გენერალური დირექტორი - ირაკლი ყურაშვილი და საქართველოში ევროკავშირის დელეგაციის წარმომადგენელი - ალექსანდრე დარასი ღონისძიებაზე სიტყვით გამოვიდნენ და პროექტის პერსპექტივებზე ისაუბრეს.
შეხვედრის მონაწილეებმა შინაგან საქმეთა სამინისტროსა და სხვა პარტნიორი უწყებების მიერ პროექტის ფარგლებში განსახორციელებელი აქტივობები განიხილეს.
აღნიშნული პროექტის მიზანია საქართველოში საგზაო მოძრაობის უსაფრთხოების მართვის გაძლიერება, ავტოსაგზაო შემთხვევების აღრიცხვიანობის სისტემის გაუმჯობესება, საგზაო უსაფრთხოების სრულყოფილი მონაცემთა ბაზის შექმნა და მონაცემთა ანალიზის მიმართულებით უწყებათა შესაძლებლობების გაძლიერება.
ალექსანდრე დარახველიძემ მადლობა გადაუხადა ევროკავშირის დელეგაციას შინაგან საქმეთა სამინისტროს შესაძლებლობების გაძლიერების მხარდაჭერისთვის.
